Jou senc en moy l'amor renouveler

Jou senc en moy l’amor renouveler,
Chanson d'amour

Jou senc en moy l’amor renouveler,
Ki autre fois m’a fait le doc mal traire
Dont je soloie en desirant chanter,
Par koy mes chans renouviele et repaire.
C’est bons maus ki cuer esclaire,
Mais Amors m’a le ju trop mal parti,
Car j’espoir et pens par li
Trop haut, s’est drois k’il i paire.

Et nepourquant bien fuit a pardouner,
Car quant dame est noble et de haut afaire
Et biele et boine et gent set honorer,
Tant desiert mius c’on l’aint par essemplaire;
Et doit estre deboinaire
Enviers povre home en otriant merchi,
Sauve s’ounor, car jou di:
Ki de boins est, souéf flaire.

Et par mi chou le m’estuet comparer:
Mes cuers me laist, ma dame m’est contraire,
Et vous, Amors, ki de ma dame amer
Dounés talent autrui por moi mal faire.
Les gens ne se poeënt taire,
Et nis pitiés s’est repunse pour mi;
 Asés de meschiés a chi,
Ains c’on en puist joie estraire.

Dame, vo oeil me fontjoie esperer,
Mais vo bouce se paine de retraire
Le largeche k’il font en resgarder;
Par leur douçour vienc en espoir de plaire,
Car il sont en un viaire
Si amoureus, si doc et si poli
C’onkes courous n’en issi
Fors ris et samblans d’atraire.

Pour si dous ieus doit on bien lonc aler
Et moult i a pressïeus saintuaire;
Mais on n’i laist baisier ni adeser,
Ne on ne doit penser si haut salaire.
Drois est c’on se fraingne et maire
 Viers tel joiel et c’on soit bien nouri,
Sans faire le fol hardi
De parole u de pres traire.

Ajouter un commentaire

Vous utilisez un logiciel de type AdBlock, qui bloque le service de captchas publicitaires utilisé sur ce site. Pour pouvoir envoyer votre message, désactivez Adblock.

banniere-1.png

Créer un site gratuit avec e-monsite - Signaler un contenu illicite sur ce site